Sa usa ka eksklusibong interbyu sa Proud Bisaya Bai, gipaambit ni Cyrel Dosdos ang iyang makapadasig nga istorya kung giunsa niya pagpadayon ang iyang pagtuon. Bisan pa man sa kalisod sa kinabuhi, lig-on ang iyang determinasyon nga makahuman sa kolehiyo.
Sa wala pa siya madawat sa CHED scholarship, buot unta niyang mahimong working student, apan naabtan siya sa email sa CHED nga nagpahibalo nga usa siya sa ilang mga scholar. Bisan pa nga dili kompleto ang tabang sa CHED sa iyang tuition, nagpasalamat si Cyrel sa Ginoo tungod kay sa panahon sa tingbayad, adunay mga tao nga mukalit og abot aron mutabang, ug usahay makakuha siya og kwarta pinaagi sa paghimo og tarpaulin ug graphics.
“God works in mysterious ways jud,” matud niya.
Ang nag-unang rason sa iyang paningkamot sa pag-eskwela mao ang kalisod sa ilang pamilya. Naluoy siya sa iyang buta nga amahan nga nagbaligya og tambal sa kadalanan, bisan sa ulan o init. Gihisgotan usab niya ang sakit nga panghitabo dihang nabanggaan ang iyang amahan ug ang pag-ubos-ubos sa ubang tao nila. Mao kini ang nagtulod niya ug sa iyang igsoon nga maningkamot makalingkawas sa kalisod.
Alang sa mga estudyante nga nag-atubang sa susama nga sitwasyon, tambag ni Cyrel nga dili himuong babag ang kalisod, pero himuon kining inspirasyon sa pagpaningkamot. Importante usab ang pag-ampo ug pagsalig sa Ginoo. “Wala juy imposible ni God for as long as makita pud niya nga naningkamot ka para sa imong gi-ampo,” ingon ni Cyrel, naghatag og gibug-aton sa panultihon, “Nasa Diyos ang awa, nasa tao ang gawa.” Giawhag niya ang tanan nga mosalig sa Ginoo, tungod kay tabangan ug giyahan ra ta Niya.
