CEBU CITY, Philippines — Usa ka 20-anyos nga lalaki ang namatay human gipusil og makadaghang higayon sa duha ka wala mailhing suspek nga sakay og motorsiklo sa Sitio Lower Gun Club, Banawa, Barangay Guadalupe, Cebu City, pasado alas-9 sa gabii niadtong Miyerkules, Hunyo 3.
Sumala sa inisyal nga imbestigasyon sa kapulisan, nahitabo ang pagpamusil sa usa ka lugar sulod sa sitio diin gitumbok sa mga saksi nga kalit lang miduol ang mga suspek ug gipusil ang biktima sa makadaghang higayon sa wala pa sila midali og sibog gikan sa maong lugar.
Bisan pa sa paspas nga pagtabang sa mga responder ug pagdala sa biktima ngadto sa ospital, gideklarar kini nga dead on arrival sa mga doktor. Matud sa mga imbestigador, nakasulti pa og pipila ka mga pulong ang biktima sa wala pa siya makabsan sa kinabuhi.
Usa ka residente nga nakakita sa insidente miingon nga human sa pagpamusil, milayas dayon ang mga suspek ug gitabonan kuno ang ilang mga dagway gamit og payong samtang nagpalayo gikan sa crime scene.
Sa pagpadayon sa hot pursuit operation ug imbestigasyon, nakadakop ang kapulisan og usa ka person of interest (POI) alas-3:30 sa kaadlawon sa Huwebes, Hunyo 4. Sumala sa mga awtoridad, gisuspetsahan nga maoy midani o mitawag sa biktima ngadto sa lugar diin nahitabo ang pag-atake.
Gikompirma usab sa kapulisan nga dili residente sa Sitio Lower Gun Club ang biktima, nga maoy usa sa mga anggulo nga ilang gisusi aron matino ang motibo sa krimen ug ang posibleng koneksyon sa nadakpang person of interest.
Padayon karon ang imbestigasyon sa mga awtoridad aron mailhan ug madakpan ang mga responsable sa pagpamusil. Gisusi usab nila ang posibleng personal nga panaglalis, illegal nga kalihokan, ug uban pang motibo nga mahimong nalambigit sa maong krimen.
Samtang wala pa mopagawas og dugang detalye ang kapulisan, gidasig nila ang publiko nga motabang pinaagi sa paghatag og impormasyon nga makatabang sa pagpasaka sa kaso ug pagdakop sa mga nahilambigit sa insidente.
Comments