“Kumusta?” Usa kini sa pinakasayon nga pangutana, apan usahay lisod tubagon. Kay unsaon man nimo pag-ingon nga okay ra ka kung sa tinuod, gikapoy na diay ka?
Kapoy sa trabaho. Kapoy sa responsibilidad. Kapoy sa mga problema nga mura’g walay katapusan. Adunay mga adlaw nga gusto na lang nato mohunong ug mopahulay gikan sa tanan.
Apan bisan pa sa kakapoy, nagpadayon gihapon ka. Kada buntag nga mobangon ka aron moatubang sa bag-ong adlaw, usa na kana ka dakong kadaogan. Bisan og usahay murag bug-at na kaayo ang tanan, ayaw kalimti nga lig-on ka kaysa sa imong gihunahuna.
Dili kinahanglan nga kusgan ka pirmi. Adunay mga higayon nga pwede kang mokapoy, mohilak, o mopahuway. Dili na timailhan sa kahuyang, kondili usa ka pahinumdom nga tawo ra gihapon ka.
Kung gikapoy na ka karon, pahulay kadiyot. Hatagi og panahon ang imong kaugalingon. Apan ayaw paghunong sa pagdamgo ug pagpadayon. Hinumdumi nga ang matag kalisod adunay katapusan, ug ang matag bagyo moagi ra usab.
Busa, kung mangutana ang usa ka tawo, “Kumusta?” ug ang imong tubag mao ang “Kapoy na ko,” ayaw kabalaka. Normal ra kana. Importante nga bisan gikapoy ka, nagpadayon gihapon ka.
Padayon lang. Kay ang imong gihago karon, mahimong hinungdan sa mas maayong kaugmaon ugma.
Photo courtesy of Vecteezy
Comments